2017 жылы қаңтардың 5-нен үлкен экрандарға жол тартқан Рүстем Әбдірашевтың «Қазақ Елі» киносериалының кинонұсқасы – «Алмас қылыш» көркем фильмінің бүгінгі күннің есебі бойынша жинаған сомасы 72 млн 172 мың теңгені құрап отыр. Алғашқы екі апта ішінде 2,5 мыңнан астам сеанс, оның 60% қазақ тілінде, ал 40% орыс тілінде көрсетілді. Фильмнің кинотеатрлардағы көрсетілімі әлі де жалғасуда.

15 ақпан күні КСРО халық артисі, КСРО және Қазақ КСР-нің Мемлекеттік сыйлықтарының лауреаты, КСРО кинематографистеродағының мүшесі, көрнекті театр және кино актері, белгілі кинорежиссер, ұлттық дүниетанымды  экрандық өнерде алғаш бейнелеген  ұлы суреткер – Шәкен Кенжетайұлы Айманов 103 жасқа келіп отыр.Осыған орай Ш.Айманов атындағы «Қазақфильм» АҚ басшылығы, режиссер Сатыбалды Нарымбетов, Нұрлан Санжар, Ерболат Тоғызақов, Қазақстан кинематографистер одағының тең төрағасы Ахат Ибраев және «Қазақфильмнің» қызметкерлері қазақ киносының майталманы ескерткішіне гүл шоғын қойды.

Ресей киносы күндері Қазақстан Республикасы мен Ресей Федерациясының арасындағы Мәдени ынтымақтастық туралы келісім, сонымен қатар 2016 жылғы 5 қыркүйекте Мәскеуде қол қойылған 2017-2019 жж. арналған ҚР Мәдениет және спорт министрлігі және РФ Мәдениет министрлігі арасындағы Мәдениет саласындағы ынтымақтастық бағдарламасы аясында өткізіледі.

Ш. Айманов атындағы «Қазақфильм» киностудиясында ҚР мәдениет және спорт министрлігінің тапсырысы бойынша «Беткейдегі бұталар көлеңкесінде» (шартты атауы) атты  жаңа толықметражды көркем фильмінің өндірісі басталды. Фильмнің режиссері − «Сіз кімсіз, Ка мырза?» (2010 ж.) фильмімен танымал Қуат Ахметов. Фильмде басты рөлді биыл мамыр айында 80 жасқа келетін КСРО және Қазақстан Халық артисі Асанәлі Әшімов сомдайды.