2011 жылдан бастап кинопрокат жүйесіне түсетін барлық фильмдер мемлекеттік тілде дубляждануы керек

CA-NEWS (KZ) хабарлауы бойынша

Бүгін BNews.kz интернет порталында өткен онлайн-конференциясы кезінде Қазақстанның Мәдениет министрі Мұхтар Құл-Мұхаммед: «2011 жылдан бастап Қазақстанда кинопрокат жүйесіне түсетін барлық фильмдер мемлекеттік тілде дубляждануы керек» — деп, мәлімдеді.

Бұл заң өз күшіне енді, келесі жылдың 1 қаңтарынан бастап, барлық прокатқа берушілерден кез-келген фильмнің қазақ тілдегі нұсқасын беруін талап етеміз. Сол кезде ғана біз қазақ тіліне дубляждалған фильмді Қазақстан аумағында көрсетуге рұқсат береміз, — деді, М. Құл-Мұхаммед.

Министрдің сөзіне қарағанда прокатшыларға екі түрлі талап қойылады.

«Біріншісі — прокаттық төлқұжатты алу. Прокаттық төлқұжатқа ие болу үшін, екінші талапты орындау шарт. Ол шарт — міндетті түрде фильмнің қазақ тіліндегі дубляжы болуы керек. Қазақ тіліндегі фильм үлкен экрандарға шықпаса да, оның қазақ тілді көрермендерге арналған қазақша нұсқасы болуы шарт, себебі,  біздің еліміздің мемлекеттік тілі — қазақ тілі» — деп, атап өтті министр мырза.