• 07.02.2019

    Отандық деректі фильм Лондон кинофестиваліне қатысады

    Барлық фотосуреттерді көру
    Жаңалықтар фотогалереясы
    «Бабалар мұрасы» деректі фильмі Лондон халықаралық кинофестивалінің конкурстық бағдарламасына қатысады. Фестиваль 2019 жылғы ақпан айының 16 мен 23 аралығында өтеді. Картина екі аталым «Үздік қысқаметражды деректі фильм» және «Үздік қысқаметражды деректі фильмдегі монтаж» бойынша бақ сынамақ.

    Режиссер Берік Жахановтың аталған картинасы ҚР Мәдениет және спорт министрлігінің тапсырысы бойынша Ш.Айманов атындағы «Қазақфильм» киностудиясында түсірілген  «Қазақстанның түркі халықтары» циклынан. Бұл деректі цикл Қазақстанда тұратын түркі этносына арналған. «Бабалар мұрасы» фильмінен бөлек циклда режиссер Камила Әбділдинованың «Дәм түсі», Надира Садуованың «Жіп», сондай-ақ, Динара Манабаеваның «Чуваштар. Қазақстан – менің екінші отаным» туындылары бар. Әр фильмнің авторы бас кейіпкер арқылы белгілі ұлттың дәстүрі, тұрмысы және мәдениеті жайлы айтуға тырысқан.   «Бабалар мұрасы» фильмі өзбек диаспорасы туралы сөз етеді және оңтүстік Қазақстанда тұратын аталарының ісін жалғастырып, бесік әзірлеумен айналысатын  47 жастағы Абдиманноп Зупаровтың өмірі жайлы баяндайды.

    - Фильміміз осындай айтулы фестивальге қатысып отырғанына қуаныштымын. Бәрі де ойдағыдай өтіп, біздің фильмімізге жүлде бұйырады деп сенемін. Өйткені картина жақсы шықты. Фильмде өмір бар, - деп ойын жеткізді режиссер Берік Жаханов.

    Жыл сайын Лондон халықаралық кинофестивалі өз шығармашылық алаңында киноиндустрияның түрлі өкілдері  - енді аяқ басып келе жатқан киногерлер мен кәсіби режиссерлердің, дистрибьютерлердің басын қосады. Фестиваль әрдайым киноның барлық формасы мен жанрына ашық, әсіресе киноөнерінің жас өкілдеріне, кинематографтың даму үлгілеріне аса назар салады.
    Естеріңізге сала кетейік, «Бабалар мұрасы» фильмі былтыр Алматыда өткен VII Халықаралық «Бастау» кинофестивалінде Ораз Әбішев атындағы жүлдені иемдеген болатын.



    Анықтамалық ақпарат:
    Өндірісі: Ш.Айманов атындағы «Қазақфильм» АҚ
    Хронометражы: 40 мин.
    Сценарий авторлары:  Берік Жаханов, Фариза Жаханова
    Қоюшы режиссері: Берік Жаханов
    Қоюшы операторы: Қуаныш Құрманбаев
    Композиторы: Жалғасбек Рысберді
    Дыбысоператоры: Илья Гариев


    Берік Жаханов – сценарист, кинорежиссер. Т.Жүргенов атындағы ҚазҰӨА «Кино режиссері» (Н.Садығұлов шеберханасы) мамандығын бойынша тәмамдаған. Бірқатар қысқамметражды фильмдердің авторы: «Қызы орамалды шынарым»    (2012),    «Жан» (2013),    «Сен және мен» (2014), «Жалған» (2015),    «Үш нүкте»    (2016),    «Еркек»    (2017),    «Асан» (2017),     және «Бабалар мұрасы» деректі фильмі (2018 ).


Ваше имя*
Ваш E-mail*
Сообщение*
Защита от автоматических сообщений
CAPTCHA
Введите слово на картинке*

 

Шәкен Айманов атындағы
«Қазақфильм» АҚ
Алматы қаласы, Әл-Фараби
көшесі 176
302-16-77(факс)
kense@kazakhfilmstudios.kz

  


Барлық құқықтары қорғалған
«Қазақфильм» АҚ
1956-2018